「堅持行著个路，正做得看著未來个光!」

 𠊎來自台灣六堆農村，屋家世代務農，從細看等金蕉變泥膏、看等農民係仰般在烈烈日頭同險惡个社會體制苦毒下生活，為著反抗這兜無公無義，開始行上街頭；為著守護家園、守護珍貴个生態，投入美濃反水庫運動；為著搶救自家个母語、振興鄉土，分𠊎等个下一代做得自信光榮个生活，行入客家。
 
一路以來，從民間、地方到機關，一直用十分堅定个信心同毅力，堅持行著个路，煞猛為客家、為人民、為土地尋方法──毋單淨愛傳承文化，還愛不斷前行、壯大文化。

母語，對𠊎來講係蓋珍貴个情感連結，牽等𠊎等个親人同土地。一講出客話，就像歸到屋家；一講出客話，就像世世代代个祖先都透過𠊎在講話；講出客話，正知𫣆係客家人。

非常榮幸在此時此刻擔任這個重大任務，救轉客話、傳承客話、推廣客話，係未來最重要个任務，有客話正有客家文化、正有客家人，在這位愛邀請所有客家鄉親團結一心，大家手牽手共下打拚，只有堅持行著个路，正做得看著未來个光!

客家委員會主任委員